Di 22’ê Nîsana 1898’an de, bi çapbûna rojnameya “Kurdistan” a li Qahîre, bingeha rojnamevaniya Kurdî hate danîn. Ev gav, ne tenê destpêkek rojnamegerî bû, belkî jî nîşana şiyarbûna neteweyî û daxwaza ragihandina rastiyê bû. Îro em salvegera 128’an a vê destpêka dîrokî bi rûmet pîroz dikin.
Rojnameya “Kurdistan”ê, di demekê de ku şert û mercên zordar hebûn, derbasî dîrokê bû û bû çavkaniya îlhamê ji bo hemû çapemeniya Kurdî ya paşerojê. Li ser vê bingehê, bi dehan rojname û kovar hatin weşandin û ev kevneşopî heta îro jî bi hêz tê domandin.
Rojnamevanên Kurd, tevî hemû astengî û zextan, li ser şopa rastiyê rawestiyane û bi îradeyeke qewî karê xwe didomînin. Ev têkoşîn, ne tenê ji bo ragihandinê ye, belkî jî ji bo parastina bîranîn, nasname û hebûna civaka Kurdî ye.
Ji sala 1973’an vir ve, 22’ê Nîsanê wekî Roja Rojnamevaniya Kurdî tê naskirin û her sal bi rûmet tê pîrozkirin. Ev roj, bîranîna dîrokê û di heman demê de nîşana berdewamî û berxwedana çapemeniya Kurdî ye.
Platforma Kurdên Anatoliya Navîn (PKAN) jî, ji sala 2015’an ve, tevî şertên sînordar, bi ruhê xwebexşî dest bi çalakiyên çapemeniya xwe kir. Armanca bingehîn ev e ku bibe dengê rastîn yê Kurdên Anatoliya Navîn û cihêk ji bo ragihandin û parvekirina rastiyê biafirîne.
Îro PKAN, bi hêvî û biryara xwe, dixebite ku deng û rengên civaka xwe nîşan bide; da ku ev civak li dijî asîmîlasyonê raweste, rabirdûya xwe biparêze û çand û hunera xwe bi awayekî zindî li ser lingan bihêle.
Em wekî PKAN dizanin ku ev rê, rêyek dirêj û dijwar e. Lê bi azm û baweriyê, em her roj pêşve diçin, qada xwe berfireh dikin û berpirsiyariyên xwe bi awayekî baştir bicîh tînin.
Di vê rêwîtiyê de, hevalê me Necatî Gezen, wekî yek ji stûnên bingehîn, bi salan ked û xebata mezin kir û beşdarî avakirina çapemeniya PKANê bû. Îro, di roja wî ya taybet de dibe 60 salî, em wî bi rûmet û spasdarî tînin bîra xwe û dibêjin: em qet te ji bîr nakin, xebata te dê her tim bi me re bijî.
